[maria baleriz liwanag] hindi ka man namin kilala

hindi ka man namin kilala

pero para din sa iyo bakit kami nasa kalsada

kasama ng maraming iba

pasumisigaw at nakikibaka

napalo na kami ng yantok

nakaladkad at ang ulo'y pumutok

hindi agad nadala sa ospital

sapagkat hinuling daig pa ang pusakal

sa mga kapulisang malupit

kahit humandusay ka pa't mamilipit

di nila iintindihin ang iyong mga sugat

kahit mga galos at pasang natanggap

ang alam lamang nila'y sundin ang utos

ng mga nasa malakanyang at hindi ng Diyos

mapapagalitan kasi sila ng kanilang amo

kaya kahit sabi ng Diyos huwag mong saktan ang kapwa mo

hindi nila ito susundin

huwag lamang sa trabaho nila'y alisin

hindi ka man namin kilalang totoo

ngunit para din sa iyo

handa kaming masaktan

mapalo ng yantok sa ulo at katawan

kahit pa humandusay na duguan

para sa ating ipinaglalaban

lupa, sahod, trabaho, edukasyon at desenteng tirahan

matamasa lahat ng ating mga karapatan

ang larawan ay mula sa halloweencostume

[maria baleriz liwanag] nangibang bayan

maraming mahusay na pilipino sa bansa

mahusay na inhinyero, guro, nars, katulong, drayber,teknisyan, syentista

pero ang pamilya nila at sila ay lumuluha

ito kasi ang kailangan nilang itaya

dahil sa pagkakawalay sa isa't-isa

wala kasing trabaho dito sa bayan ni juan

kaya karamihan sa kanila nangibang bayan

kung may trabaho ang sahod naman ay kay baba

hindi sapat na makapagtaguyod ng pamilya

pagkalubog pa sa utang ang mapapala

itong pamahalaan walang aksyong ginagawa

tila mga bugaw pa na sa kapwa pinoy ay nag aaya

upang magtrabaho doon sa ibang bansa

*ang larawan ay mula sa gmanews

[severino hermoso] maghihintay ako

kapag sinabi kong maghihintay ako

hindi lamang ako uupo

at palilipasin ang oras sa pagtakbo

ng hindi man lang kumikibo

ang paghihintay ay katumbas ng pagbangon

sa bawat umagang sisilip simula ngayon

hanggang sa kinabukasan matapos ang ating muling pagkikita

mula sa pagkakalayong kailangan nating makasama

ang paghihintay ay pagkilos

para sa pagkakamit ng mithi

hindi lamang para sa sarili

kundi para sa kabutihan ng marami

ang paghihintay ay nangangahulugan

na magpapatuloy akong lumalaban

at batid kong ganoon ka din naman

hanggang sa magkasama tayong muli kaibigan

sa ating nasimulang pagmamahalan

magkakalayo lamang naman ang ating pagitan

hindi ang pangakong nararamdaman

hindi maglalaho ang pag-ibig na tangan

kapag sinabi ko na maghihintay ako

ibig sabihin lang nito

lalaban ako para sa iyo

at para sa paglaya ng lipunang mayroon tayo

[tula] 02_03_2011

*ang larawan ay mula sa

imagecache

[maria baleriz liwanag] Pe(ebre)ro

ikaw ang tinatanaw ng mga nag-iibigan

magkasintahan man o magkalaguyo

mag-asawa man o kabit ang pagsuyo

kahit ng hindi alam ang kanilang estado

kung magkaibigan nga lang ba o magka-ibigan

pero unawa ng mga puso ang damdaming malapad pa sa kalawakan

pusong nagpapalitan ng mga katagang

mahal kita

kahit gasgas na ang litanya

ikaw din ang tinatanaw ng mga kapitalista

para sa mga tanggalan ng manggagawa at pang-aagaw ng lupa

at maging itong gobyerno sa pag-apruba

ng mga pagtaas ng bilihin, pasahe at presyo ng gasolina

lalo yaong mga may-ari

nitong mga pribadong paaralan

sa iyo kasi papatak ang hangganan

para sa pagsusumite ng panukalang pagtaas na naman

sa matrikula ng mga estudyanteng kanilang pinagkakakitaan

Pebrero

buwan ka ng pag-aalinlangan

pagmamahal na may alinlangan

buwan ka ng mahal!

ang larawan ay mula sa

filipinowriter.com