[piping walang kamay] Panoorin mong maglaro ang mga bata

masdan mo

masdan mo ang ginagawa nila

naghahabulang animo walang problema

may nakahubad ang baro

at walang panyapak sa paa

hindi alintana ang sakit na maaaring makuha

o ang posibilidad na magpakita ang disgrasya

basta unawa nilang ang sandali ay masaya

saka na ang pagod at gutom na sikmura

ang nanlilimahid na katawan at marusing na kamiseta

panoorin mong maglaro ang mga bata

sa kanilang mundo walang puwang ang pangamba

sa kanilang palaruan nananatili ang katinuan

na bawat araw ay dahilan para lumaban

sa laro nilang naghahatid ng tuwa

sa kabila ng lipunang ito na sa kanila'y sakit ang dulot

panoorin mo sila

panoorin mong maglaro ang mga bata

ang larawan ay mula sa flickr.com

at ryan sulit

[piping walang kamay] bakit may namumundok?

binugbog si ando na magsasaka

iniwan siyang nakahandusay at di na humihinga

maraming nakasaksi noong siya'y pinaslang

ng mga bayaran at bituka'y halang

sa harap mismo ng kanilang tahanan

sa harap mismo ng kanyang pamilya

at noong inireklamo ng mga naulila niya

si congressman at ang mga bataan nito

na siyang responsable sa pagkamatay ni ando

para ba gang dumulog sila sa hangin

hanggang sa kasalukuyan nasa laya ang mga salarin

masaklap pang pati lupa nila kasabay na nahiwalay din

nangyari ito isang dekada na ang dumaang kay tulin

walang mata ang hustisya para sa mga maralita

walang batas na nangangalaga at magpoprotekta

basta ninais ng mga gahamang may pera

parang bolang paglalaruan ang ating hustisya

walang testigong magdidiin sa may sala

kapag nanaig ang pananakot gamit ang pera at bala

ang batas na alam ng mga pulitikong buwaya

at mga ganid na panginoong may lupa

kaya huwag magtaka

kung bakit dumarami ang nagsisiksikan sa maynila

at sa iba pang sentrong lungsod sa buong bansa

ngunit lalo't higit huwag ipagtaka

kung bakit may namumundok para hanapin ang hustisya!

*ang larawan ay obra ni Parts Bagani, isang manggagawang pangkultura mula sa Mindanaw.