[severino hermoso] rosas

hindi natin lubos na kilala

ang isa't isa

hindi pa

datapuwa't sapat na ang misteryong iyon

upang yakapin

kahit ang mga tinik

upang tayo'y magkasama

at magsama

at sikaping mabuo

ang isang pagsintang hindi man

matumbasan ang gandang inaalok

ng mga obra ni Amorsolo

o higitan ang mga lumalabang talinghaga

na likha ni Amado

tatangkain pa rin nating gawin

ang natatanging obrang sadyang atin.

namumukod tangi

titingkad ang kariktang angkin

magniningning na animo bituin

tuwing takipsilim

sa tulong ng bawat kahinaan

na ating sisikaping pangibabawan

nakahanda tayong matuto 

sa bawat kakulangan at mali

at hindi tayo natatakot

sa bawat hamong magkatuwang nating susuungin

sa tulong ng sambayanan

sa gitna ng pakikibaka

na naging sangandaan natin
kung saan tayo nagtagpo
ang mga nagmamahal
nating puso.

sapagkat dalisay na damdamin

ang bumubukal sa bawat pagpintig

nitong pagmamahal

na nagmumula

sa nag-iisang

ako

 at

ikaw

magpapatuloy tayo.

magmamahal.

*alay ko para sa aking pinakamamahal na si kamz. <3 Para sa ating ika-28 buwan! ;) mahal kita!

+ang larawan ay mula sa webdesignburn.

[severino hermoso] huwag mong itali ang mga bulaklak

hindi ko ibig ikulong yaring pagmamahal ko sa isang kahon

kung saan ipinaloob ang tsokolate upang magmistulang

kumikinang na dyamante sa sandaling ilabas na't

mahagip nitong mga nagkalat na silahis

ang pambalot na palarang nagpakintab sa kulay bughaw

hindi ko ibig igapos yaring pagmamahal

sa isang pumpon ng bulaklak na iaalay sa iyo

upang kahit papaano

pangitiin ang nalulungkot na puso

at palisin ang luhang sa mata mo'y

nakalambong at ibig nang tumulo

aabutan na lamang kita

isang rosas

huwag lamang

igapos ang kahit anong bulaklak

sa isang pumpong pang-alay para sa pagmamahal

pagkat hindi itinatali

ang damdaming dakila at busilak
na mananatili

kahit magwakas na ang ating nobela

sa daigdig na mayroon tayo

sa kasalukuyan

*ang larawan ay mula sa THE WONDROUS PICS

Palayain ang lahat ng Bilanggong Pulitikal!

Hanga ako sayo.

Sa tatag na ipinamamalas mo.

Di biro ang hapdi

dulot ng pangungulila

lalo’t malayo ang mahal na pamilya

mga kaibigan at kasama

Subalit kinakaya mong lahat

simula’t sapul

Tinitiis ang lumbay na

tila barenang nanunuot

Maghihilom din ang sugat

At higit pa sa kinasasabikang maiinit na yakap

Ang ibig na igawad

At matatanggap

Kapit pa at magpakatatag

Habang patuloy kaming nakikibaka at lumalaban

At ganun din ikaw na patuloy

sa sambayanan naglilingkod

at sa rebolusyon

kahit nasa loob ng piitan.

Kaunti na lang

makakarga mo na’t mahahalikan

ang kasisilang na anak.

[tula] 2012_04_12 

Palayain lahat ng bilanggong pulitikal! 

+ alay ko para sa isang mahusay na kasamahan (waward dionisio) at sa lahat ng political detainee. Isa sa mga Bilanggong Pulitikal na piniit nitong estado dahil lamang sa salang ipaglaban ang karapatan ng mamamayang patuloy na inaapi ng mga nagsasamantalang uri. Kapit lang brad! Kahit nananabik na din kaming makasama ka. Kaunti na lang. Makakasama ka din namin. Bahagi itong tula ng chapbook na "para sa masa" (ikalawang pagtatangka).

[Jose Maria Sison] Paminsan-minsan Sabik ang Puso sa Mangga

Paminsan-minsan sabik ang puso

sa mangga kung nariyan ang mansanas

sa init kung nariyan ang ginaw

sa mabundok na kapuluan kung nariyan ang kapatagan

kay layo ng kaib’han sa tahanan

at sa daloy ng mga kaibigan at kamag-anakan.

Ang mga di kinasanayan at kinasasanayang

bagay at lugar na naghuhudyat

sa hapdi ng mga patid na ugnayan

ang mga kawalang dulot ng antala at kaligta.

Direct dialing at fax machine

computer disc at video cassette

mga bisitang lulan ng supersonic jet

ay bigong paglapitin ang agwat

ng mga aral na pagpapamalas

at mga kaalwaan sa tahanan.

May mga kasama at kaibigang

nakakapagpa-ibig sa lupang dinayuhan

subalit sila’y may sariling gawi,

may sariling buhay na di abot ng pang-unawa

at pakialam ng dayuhan.

Silang ibig ipagkait sa distiyero

ang tahanan, mga kaibigan at kamag-anakan

ang buhay, katawan at kalayaan

ay sila ring pinakamaingay;

Na siya raw ay nakalutang

sa dagat matapos siyang hugutin

sa lupang pinag-ugatan.

Ang distiyerong may layunin

ay patuloy na nakikibaka

para sa inang bayan

laban sa nagpalayas sa kanya

ang mga mapagsamantala,

at kahit tiyak na nananahanan

sa kanyang bayan at sandaigdigan.

*Distiyero - (exile sa ingles) malayo sa sariling tahanan o bayan dahil sa hindi pinahihintulutan umuwi o bumalik o dahil may banta sa seguridad o buhay sa sandaling bumalik.

[Maria baleriz Liwanag] Kondominyum

Matitikas ang tindig ng mga gusali.

Nagyayabang sa tayog at kariktan

doon sa katabing lote na kinatitirikan

ng mga barung-barong ng karukhaan

Napakaraming kondominyum na ang naitayo.

Marami pa ding bakanteng mga pinto

habang sa ilalim ng mga tulay at tabing estero

nagsisiksikang daig pa ang mga sardinas sa lata

itong karamihan sa ating inaapi ng sistema.

Mga tinawag ng lipunan

maralita.

[piping walang kamay] May luhang sumalubong sa pagdating mo Disyembre

sa mga sandaling ito ng taon na kumukupas

ang init na bihis nitong hangin kanya nang hinubad

at buong higpit lamig ang niyayakap

nanunuot sa bawat himaymay ng kaibuturan

habang dahil sa isang biglaan paglisan

ang nadaramang sakit hinuhubad ko naman

kasabay ng bawat luhang dati'y nabigo

walang kamay mo ngayon upang magsilbi kong panyo

kailangan kong itulak ang bawat paghakbang

buhatin ang bigat makasulong lamang

sapagkat batid kong kung narito ka rin lang

hindi mo nanaising sa pagdurusa ako madarang

malaya man itong puso na umiyak

sapagkat wala ang labi mong magpapatahan

titiisin kong walang hibik na marinig

kahit paghihirap na ang dinaraing ng isip

sapat na bang luha ang magpaliwanag

sa kung sino man yaong naghahanap?

sapat na bang luha ang magsumbong

noong paglisan ang piniling isalubong

sa hinihintay na Disyembre?

*ang larawan ay mula sa  flickr