[piping walang kamay] paglaya maricon

*Kaarawan mo noong ika-25 ng Pebrero kaya bilang pagpupugay at patuloy na panawagan para sa paglaya ng mga tulad mong political detainee! allay ko sa iyo maricon 'freedom' montajes

iniisip ko

kailan tayo unang nagkita

saan at paano nagkakilala?

ang alam ko hindi naman ganoon kaluma

tulad ng nagdaang isang dekada

yaong pagitan noong unang magtagpo

ang letratistang tila tinotono

ang hawak hawak na camera

na may pinipihit sa bilugang lenteng pangkuha

nitong mga lungkot at pighati

mga luha at pagdurusa

mga ngiti at pagtawa

sa hanay ng masa

isang babaeng nasa katanghalian ng kanyang pagkatao

at animo ikinakasa ang gamit na camera

matapos ang bawat obrang kuha

sa bawat galaw ng pagsasamantala

at paglaban

may ngiti sa mga mata

hindi iyon halos nawawala

at lumuluha ang mga labi

na tila nagmamakaawa

ikaw nga

ang tila kumukupas na talinghaga

subalit nananatiling sariwa

tulad ng mga kuha mong larawan

at obrang tila ikinulong sa kwadra

ang bawat metapora

sa hanay ng nagmamadaling paligid

na tila ayaw man lang mahiga saglit

upang magpahinga o umidlip

kung ang bawat pagkakakilala

nag iiwan ng tatak

sa gunita ko'y nag iwan ka ng pilat

gamit ang masiyahin mong imahe

makulit na pagkilos na di mo aakalain

maricon hayaan mong palayain

ka namin

sa aming mga awit at tugma

sa bawat bibigkasing mga kataga

hindi kami magsasawalang bahala

uusigin nitong aming bawat letra

bawat naming panulat

bawat namin larawang kuha

yaong mga may sala

yaong sa atin ay patuloy na nagsasamantala

hanggang ikaw at ang maraming

iba pang detinidong pulitikal

makalaya na sa karsel na sa inyo'y pinaglagyan

maglalagablab ang mga larawan

paglaya ang isinisigaw

tulad ng mga kuha mo

kahit sa loob ng kwartel

lumalaban!

*makikita din ito sa facebook

[piping walang kamay] inabot namin ang ika-trenta

isang pag-aalay ng tula para sa bayan at para sa aking pinakamamahal na karelasyon na si Pauline para sa aming ika-30 buwan. :)


mahal ko siya
kagaya ng pagmamahal ko sa iyo
mahal ko siya tulad ng pagmamahal ko
sa aking ina't ama
sa aking mga kapatid

nauuso din sa pagitan namin ang tampo
at minsan para kaming nasa magkalapit na bundok
na kailangang bumulyaw
upang ipaabot ang nais ipaalam
kahit pa nga halos isang dipa lang ang aming pagitan

minsan para kaming mga bata
nagmamaktol kapag di napagbigyan
sisimangot ang mukha na tila nilukot

di bibigkas kahit isang kataga
kapag naiinis di maipinta ang mukha
at hahantong ito sa ilang araw na walang 'Hoy!' ni 'Hi!'

nagtatalo kami sa maliliit na bagay
at tatagal ng ilang araw
pero tulad ng sugat
maghihilom

madalas ang gamot talaga: pag-uusap
at ang pagpapakumababa't pang-unawa
mabisang panlunas sa pusong may hinanakit
at tampong binabata
minsan kahit walang paliwanag na mamagitan
parang walang digmang nagdaan sa aming pagitan
sapat na ang isang yakap o halik sa noo
o kaya ang isang taus-pusong paumanhin
at ang pader na dadaigin ang Great Wall ng Tsina
na nakapagitan sa amin ng ilang araw
malulusaw

tumpak talaga ang tinuran
ng dakilang makata na si Mulong**
napopoot tayo pagkat nagmamahal

minsan halos humantong sa paghihiwalay
yaong maliit na pagtatampuhan at away
pero kapag dumating ang ganoong bagay
payong kasama at kaibigan
huwag kalimutang kumalma at maging matatag
at balikan ang simula ng lahat
kung paanong sumibol ang relasyong inyong pinanday
sa pamamagitan ng awit at kilig at paglalakbay
kasama ang sambayanang pinaglilingkuran
kung saan nalipos ang inyong paligid
ng musika, at kariktan at paglaban
kung saan hinubog ninyo ang love story na kayang higitan
ang mga ipinapalabas sa mga pinilakang tabing

mahal ko siya
kagaya ng pagmamahal ko sa iyo
kagaya ng aking pagmamahal
sa pakikibaka para sa paglaya

**Ang palayaw na Mulong ay bansag sa makatang si Romulo Sandoval.
ang larawan ay mula sa Redbubble.

[maria baleriz liwanag] dapat sa mga iyan binabato sa ulo

dapat sa mga iyan binabato sa ulo

ng buko

silang ang iniuulat

imbes na katotohanang dapat isiwalat

iyong pananakit sa tv ipinagkit

na dahil sa apat na dekadang panggigipit

yaong mga nagpoprotesta naitulak na pilit

na lumaban na't gumanti sa pananakit

dapat sa mga iyan binabato sa ulo

ng buko

silang nag-uulat

ng kung ano-anong shit

hinggil sa kung bakit

ang mga magniniyog ay naggiit

ng kanilang karapatang ninakaw pilit

ng mga tulad ni Marcos, Enrile, at Danding

at ngayon nga kasama na itong abnoy na praning

dapat sa mga iyan binabato sa ulo

ng buko

nagsasabwatan ang mga loko

mula kina marcos, enrile at danding cojuanco

ngayon dumagdag pa itong bagong gobyerno

magniniyog ang lumikha ng kita

mga ulupong ang siyang nagpakasasa

magniniyog ang naghirap

mga damuhong linta ang nagpakasarap

dapat sa mga iyan binabato sa ulo
ng buko

huwag lang isa
kundi tatlo
huwag mula sa malayo
ihambalos dapat sa ulo
kapag nabuhay pa ang mga loko
absuwelto!

 


ang larawan ay mula sa http://kilusangmagbubukid.org