[piping walang kamay] langib at pilat

at maaari nga
hindi na muling makikita
kundi sa mga larawan na lang at alaala

at maaari nga
hindi na muling makikita
ang mga luha at mga ngiti
ang damdamin mo't pakikibaka
para sa masa
na ating iniibig
pinaglilingkuran
ipinaglalaban

at maaari nga
hindi na kailanman maririnig
sa malapitan
ang mga aral mo at pagsasalaysay

at maaari nga
hindi na maririnig
ang mga paghalakhak
kahit ang iyong pag-iyak

at maaari nga
hindi na kailanman madarama
ang pagpintig ng iyong puso
ganoon na din ang paghinga

at maaari nga
hindi na madarama
ang mapag-aruga mong kamay
at paghawak mo ng mahigpit
sa ating pakikibaka

at maaari nga
hindi na kailanman makakasama

babaha ng luha
at magiging musika ang mga pagtangis
iduduyan kami ng pagdadalamhati
ngunit hindi ka namin matitiis
patuloy kang mananatili
dito sa puso't isip

magpapatuloy
raragasa
ang higit pang pakikibaka
mula sa iyong mga aral
inspirasyon kang aming bitbit
daladala
sa lahat ng dako
sa lahat ng panahon
sa lahat pagkakataon
sa aming pagrerebolusyon
tulad mo ngayon
ay sugat na malapit nang maghilom
ang langib ay marahang
humihiwalay sa lupang
matagal na panahong ipinaglalaban
samantalang sa iyong pagpanaw
iiwan mo ay pilat
sa aming gunamgunam
habang buhay na kasama
saan man kami mapunta
dito sa puso
dito sa alaala
at kahit nga sa huling sandali
na kami man din ay susunod na
sa kung saan ka na ngayon papunta

taas kamaong pasasalamat!
sa pagkakataon
na makilala ka't makasama
sa pagkakataon na matalos
ang iyong kasaysayan
...dakilang anak nitong bayan!

*tulang alay para kay sir monico atienza

[piping walang kamay] at ikaw babae

...at ang bata ay lumuha

pumalahaw ng iyak

halos di na nga makakita

dahil sa pikit matang pagtangis

sa kanyang manikang nasira

hayun at kurot ang inabot

mula sa inang nayayamot

naririndi sa ingay na likha

nababanas na akala mo di dumaan sa pagkabata

ang nanay na ngayoy sambakol ang mukha

pero tingnan mo ngayon ang dating paslit

malayo na mula sa musmos ng pag-iyak at awit

heto masdan mo't taas kamaong tumitindig

di alintana ang hirap at pasakit

para sa karapatan ng kababaihang sa lipuna'y minamaliit

nireregla ka hindi dahil sa wala lang
habang ang isang paa moy nasa hukay sa tuwing magsisilang
kaya ba iyan ng mga kalalakihan?
o mas angkop itanong matatanggap ba nila ang ganyan?

sa palagay ko'y hindi...
sapagkat di talaga sila tunay na matatag
alam lamang nila ay gawin kang parausan
utusan at bilangin ang mga babaeng sa kanila'y nagdaan

kaya ka babae
upang gawin lahat ng halos imposible...
ituwid ang maling palagay ng lipunang pyudal
at patunayang hindi ka robot na de-susi
na hindi ka sunud-sunuran sa bawat mga utos
may talino kang mag-isip at kumilos
para sa paglaya ng iyong uri
ng kababaihang kay laon nang dinuduhagi

at ikaw babae...
hindi ka mahina tulad ng itinatak sayo ng lipunan
hindi ka lang pambahay at tagapanatili ng kaayusan
maraming bagay pang magagawa ang kababaihan
sapagkat ikaw ay sagisag ng husay at katapangan

at ikaw babae...
hindi ka lumuluha dahil sa ikaw ay mahina
dahil bawat luha mo'y patak ng tatag ang iyong ipinapakita
babae kang kayang tumapat sa kakayanan nino man
hindi ka nilalalng para gawing palahian

at ikaw babae...

di tunay na mahina kagya nang kanilang sabi

ikaw ang tunay na simbolo na tatag at tapang

sapagkat ang luha ay katapangang ipakita ang iyong nararamdaman

at ikaw babae

palaban

matapang

militante!