[piping walang kamay] kalayaan

hindi lansangan

hindi ito basta iginuguhit sa kamiseta
at ibebenta ng mga kapitalista

o itinatato sa katawan
na mga letra o larawan

hindi basta simbolong kinakatawan ng watawat
hindi basta

ang...


higit ito sa pagbubuwis ng buhay

pag-aalay ito ng dugo pawis luha
at maging ng lupa at pangarap

paglaban ito upang mabuhay.

hindi lang ito ikaw at ako
higit ito sa pamilyang meron tayo

higit ito sa bansa

higit sa pagboto o pagpili ng pinuno

higit sa karapatang makapagpahayag ng pananaw

higit ito

sapagkat tungkol din ito sa tungkulin

kapag may naghihirap pa din
tandaan mo

kailangan pa rin natin itong ipaglaban
hindi sapat na hanapin
o hintayin

iyong tinatanong, sinasabi, pinapangarap, ipinagyayabang, at ibinabandila

dahil sa kasalukuyan
binaboy na nitong nasa isang porsyento ang dalisay na kahulugan

ng...

kung hindi mo pa nage-gets
magpakamatay ka na

iyan

kalayaan

mula sa pagsasamantala


tignan natin kapag patay na lahat ng ninety nine percent

saan pupulutin ang mayayaman sa present?

[piping walang kamay] hlunig yoaps

sa pagtalikod ko

at paghakbang palayo

hindi mo makikita

ang pagbalong ng luha sa mga mata

at higit ang pagragasa

nila sa aking pisngi

ang lungkot na iginuhit

nitong labi na hihinto sa pag-awit

hindi ko ipapakita ang bigat

subalit sa paglayo

bubuhatin ko ang sakit

upang simulang buuhin

ang lahat

mga nagkapiraso kong pangarap

[piping walang kamay] lnsanagn

kailan kaya muling magkikita

ang mga yapak mo

at ang mga hakbang ko

kailan kaya muling magtatanong

hindi ng ngalan mo

kundi ng daan patungo sayo

dian sa puso mo

[Piping Walang Kamay] panalangin sa klase

magnilay-nilay tayo ngayong unang araw ng klase
tinubos na ni Kristel Tejada ang ating mga pake

hindi lamang dapat pag-aaral ng mabuti
marami mang papasok marami pa din ang hindi

pagtapos ng bawat panalangin
kung saan pasasalamat ay lalamanin

huwag nating kalimutan ang mga martir
na dahil sa edukasyon buhay nag-disappear

makibaka ka para sa karapatang makapag-aral
isa itong mabuti at marangal na asal




*pake - utang

[piping walang kamay] pasukan

tumilaok na ang tandang

wari mo alarm clock na nananawagang

pumatak na ang hudyat upang

magmulat magbangon at maligo

hilamusan ang pagkatao

magpalit nang bihisang kamiseta

malapit nang sumungaw ang umaga

malapit nang humiyaw ang bell

marami-rami na rin namang naghahabulan

ang mga guro bago ang bihisan

may mga bagong usbong sa mga halaman

may mga bagong sanga sa mga puno

may mga bagong mukha sa silid

suot ang unipormeng pinaglumaan ng kapatid

subalit marami pang nananatili

siksikan sa mga silid na mumunti

pisarang bagong pinta't hinabi

bentilador na bungi na ang elesi

yayat na mga katawan, alikabok sa yapak at binti

sa lumang back pack na gamit

pinaglumaang kwaderno ang bitbit

isang bolpen, upod na pambura, at maliit na lapis

habang naglalakad na bituka'y galit

nagdarasal na may mga aklat na ma-awit

sa unang klase marami pa rin ang absent

iyong iba sa pagawaan na present

at yaong mga dahong natuyot

humimlay na sa sahig

habang sa pasukan si manong guard

napapakamot sa ulo habang nakangiti

ang matandang punong narra nakatindig