[piping walang kamay] ang kaso

sa sino mang kumakalaban

magsipaghanda

kayo'y masasaktan

at dadakpin ng walang-awa

huwag na kayong magkakawag

ni magbitiw ng mga salita

dudugo lamang ang labi ninyo't

mamamaga ang katawa't mukha

habang sa dulo ng lahat

asunto na ang inyong bagsak

huwag tutulad sa mga magsasakang ito

sinampulan namin ay tatlo

may kinakaharap na silang kaso

tulad nang ginawa namin

sa mga kumumpiska sa aming inangkin

mga bigas na sana'y gagamitin

sa kampanya ng mga dilawin

may pinaslang na kaming isa sa mga lider

at susunod ay ang pagkakaso na rin

anong karapatan para sa lupain?

hindi din iyan palalagpasin

mga nag-standoff sa Sabah

kakasuhan rin

-PNoy

[piping walang kamay] drone

hindi maaaring magsinungaling
ang mga titik na makikita
sa drone* na namataang
nasa isa sa mga karagatan ng bansa

palutang-lutang

hindi maaaring maghabi
ng sinulid sa tubig

ano kayang isasagot ng mga nasa malakanyang
at ng mga opisyal ng Navy sa bansa
at ng mga kanong may dahilan
bakit naligaw sa karagatang ating saklaw
ang isang sasakyang panghimpapawid
na pinapagana ng remote control lang ang gamit?

sila tiyak magagawang maghabi ng sinulid
kahit saang lupalop ng daigdig.




*Isang sasakyang panghimpapawid na hindi na kailangan ng piloto sapagkat pinapagana ng remote control. Ito ay ginagamit ng mga hukbong sandatahan ng malalakas at mayayamang bansa bilang armas pandigma o pansiyasat upang makapangalap ng mga impormasyon sa kanilang target na bansa o lugar.

Kamakailan ay natagpuan ng ilang mangingisda sa baybaying dagat ng Masbate ang isang drone na palutang lutang.

Ang larawan ay mula sa MailOnline