[piping walang kamay] Hu u, Boni?

hindi lamang panay pagsugod

ang dunong mong paglilingkod

noon, may awit kang hinimig

may dinuyan ka ring pag-ibig

noon, may tulang sinabuhay

pagpapakasakit ang alay

'pagkat pag-ibig para sa 'yo

huwag nakakahong ituro

na mamatay para sa bayan

ang tanging pinakasukatan

kundi buhay na lumalaban

para sa mga karapatan

ano man at nino man, saan man

'to ang pag-ibig sa sinilangan

ngunit paano ka kilala

ng nakaraan sa 'yong gawa?

ikalulungkot mo nga kaya

kung mabatid mong wala na nga

halaga sa kasalukuyan

ang paglayang ipinaglaban

sino ka nga ba, Bonifacio

para sa henerasyong ito?

Ang larawan ay mula sa pook-sapot na nasyonalistik pinoy

[piping walang kamay] may plastik na basong nanlilimos sa may Avenida

minsan may isang taong grasa
nahiga sa kanyang bangketa
kamay na nagmamakaawa
basong plastik ay magkabarya

samu't sari ang mga paa
bumabagtas sa Avenida
may mayaman at paggitna
marami-rami ring maralita

may pulubing nanglilimos
mga nakayapak na musmos
sa mga along humahangos
naghihintay ng manunubos

Ang larawan ay mula sa pook-sapot na definitelyfilipino.