[severino hermoso] ang pag-ibig

ito ang damdaming dumaan at dumadaan sa lahat ng hirap

ang bawat sakit at kirot at hapdi dinanas

ito ang panlasang dulot ng bawat nagsama-samang pagsisikap

ito ang dulot ng tiyaga at pagsisipag

umusbong mula sa paglaban

hindi pagbitaw sa matuwid na paninindigan

para sa kapakanan ng nakararami

para sa adhikang hindi para sa sarili

at kung pag-ibig ang itinitimpla ng bawat puso

wala na nga marahil makahihigit sa bawat bugso

kapag ang pag-ibig ay umusbong sa gitna ng pakikihamok

sa bawat lupang may dugo at pawis at luhang tumuldok

para ialay sa pagpawi nitong laganap na paghihikahos

na inihahambalos sa atin ng mga dayong sa pagkaganid ay lubos

ito ang mainam na pumapatid sa gu-tom ng mga bituka

nagbibigay patlang sa bawat lalamunang uhaw sa paglaya

pero sa akin ding pagtingin

ito ang panlasang daranasin

nitong kahit sinong hindi nakaramdam man din

kung paano nga bang ang pagmamahal ay hindi lamang sasabihin

dito mararanasan ang higit pa sa paglalambing

hindi lamang sa pamamagitan ng bibig dadasalin

iyong animo nanunuot sa bawat himaymay at ngipin

sa kaloob looban nanunuot at di lamang tumatambay

ito iyong panlasang tila nanaisin mong mamatay

sapagkat sa isip mo nalubos na iyong pagkabuhay

noong matikman mo ito na samu't sari ang hinintay

subalit panlasa din itong magiging sanaysay

kung bakit handa at magiging handa kang mag-alay

kahit na anong kaya mong gawin at ibigay

upang patuloy na lumaban upang mabuhay

marami na silang nailutong putahi tungkol sa pagmamahal

mga pagmamahalan ng mga hari at reyna, prinsipe at prinsesa

mga kilalang personalidad kagaya noong nangyayari

sa mga tanyag na atleta, makapangyarihang tao, at artista

sa mga madalas ikinuwento ng mga burges na pelikula

sinubaybayan o napanood ng mundo ang halos lahat lahat

mula sa pagliligawan ng mga modelo at popularidad

kasama ang mga kumikinang at kumukurap na ilaw at katanyagan

subalit ang isang kapansin pansin sa karamihang nailahad

bihira ang pagtatampok ng pag-ibig ng mga uring mahihirap

at iyong pag-ibig na inanak ng pakikipaglaban

para sa hangad na katarungan at kalayaan

ang pag-ibig

ang pinakamatingkad

walang kasing tamis

walang sing sarap

lalo kung ito ay

naisulat

sinusulat

isusulat

na

paglaban ang ipinagtatapat

rebolusyon ang niyayakap

at

paglaya mula sa pagsasamantala

ang hangad

simulan mo nang isulat

ang kwento ng inyong pag-ibig na tapat

babae, lalake o piniling kasarian

hanggang ito'y naglilingkod sa mamamayan

aangkin ito ng kakaiba at natatanging kinang

sapagkat

sa rebolusyon naisusulat

ang dakilang pagmamahal!

*maaari din itong makita sa aking tala sa facebook

[maria baleriz liwanag] habang*

habang dapat nating ipagbunyi ang desisyon

kung saan labing apat na hurado ang tumugon

sa katuwiran na ang lupa ay sa mga nagbubungkal na mula pa noon

hindi pa din dapat magbaba nang paglaban

hindi dapat maging kampante ang sino man

may hustisya pang sa mga may utang na dugo dapat na singilin

hindi lamang lupa ang kabayaran ng kanilang paninikil

sa sama-samang paglaban muli tayong sasandig

habang sa gitna nang pagkukumpulan nitong mga usisero

tungkol sa tunay na katapatan ni Gloria Macapagal-Arroyo

hindi dapat kalimutang may dapat pag-ibayuhan

sa kung paano gagawing tila apoy ang katotohanan

na sa bayang ito na nag-uumapaw sa yaman at galing ang paglaban

kalakhan ng mamayan ay naghihirap at kahabag-habag

may dapat tayong itindig na ibayong pagsisipag

upang imulat ang mamamayan sa pakikibaka na dapat

habang matagal nang sinabi sa nakaraan

ilang desisyon na ang ibinababa at tinuran

hanggang sa ngayon walang kaganapan

tumpak lamang na patuloy manindigan

sapagkat hindi matatapos sa isang kautusan

ang daangtaong pakikibaka ng mga nagbubungkal

hanggang may uring patuloy na nagsasamantala

at patuloy ang paglupig sa mga magsasaka

hindi kailanman

hindi dapat

huminto ang ating pakikibaka

patuloy na lalaban tayong mga dinudusta

sa mga bwitreng dayo dito sa ating sinilangang lupa

sa gobyerno at mga ganid na nasa pwesto

sa mga madasaling panginoong hasyendero

habang naghihirap ang pag-unawa

ng mga musmos sa kalsada at mga napapariwara

ang kalakhan ng edad dahil sa kanilang gawa

hindi tayo dapat magpabaya

may digma tayong dapat na palaganapin

may digma tayong dapat na tapusin

may tatsulok tayong dapat na baguhin!
may tatsulok tayong babaligtarin!

*alay para sa mga biktimang magsasaka at sa kanilang pamilya. sa hasyenda luisita at sa mga magsasaka sa buong bansa. para sa mamamayan. alay para sa patuloy nating paglaban.

[severino hermoso] hasyenda luisita: 7 taon na ang lumilipas

Gabi gabi pa din silang naglalamay

Gabi-gabi pa din silang naghahanap

Nakikinig sa bawat agunyas

Habang sa saliw nito pagtangis ang dumadagdag

Subalit katulad ng mga tinatanggap nilang barya

Na kanilang pangarap madagdagan sana bilang kita

Sa pagpapagal sa araw araw na pagbubungkal

Madalang na pagkatig ng pagkakataon ang sa kanila'y sumasakal

Maramot ang hustisya sa bahaging ito ng mundo

Mapagkait sa mga biktimang inutas ng mga punglo

Ninakawan pa ng yamang mula pa sa kanilang mga ninuno

Hindi naman sila nagkulang sa pananalangin

silang mga kapamilya ng mga pinaslang

sa Hasyenda ng pamilya ni Peping

Malakas lamang talaga sa mga panginoon

itong angkan ni Pres. Benigno Simeon

Paanong hindi magkakaganun?

Nagmamay-ari din ng ekta-ektaryang lupain

ang mga panginoong nakaririnig ng mga dalangin

maging ang mga tagapaghatol ng hustisya

ang balabal na pinampiring sa mga mata

may mga kulay at taong kinikilala

Nakapangalong baba at ang troika ni Josefa

at hindi basta basta pamilyar sa mga barya

isang sipol lamang sa kawalan

may mga tagapagtanggol na handa silang depensahan

may sasaklolong hukbo ng mga bayarang berdugo

Ang agap sa ayuda mabilis pa sa alas kwatro

Pitong taon na ang lumilipas

Gabi gabi pa din silang naglalamay

Gabi-gabi pa din silang hustisya ang hinahanap

hindi mapayapa sa probinsiya ng Tarlac

Kahit ang hanging nananahan dito'y umiiyak

Subalit hindi na sila binibisita

ng mga Bidyo at Camera

sa radyo at telebisyon hindi na naririnig madalas

ang pambubusabos at kaapihang patuloy na dinaranas

At ang katarungang dapat

Wala ka ditong mahahanap

Kung kapatid kaya ni Sen. Revilla ang isa sa mga pinaslang?

O kaya malapit na kamag-anak ni Charice ang magsasakang tumimbuwang?

Tututukan din kaya ito ng midya?

At babaha din kaya ng pakikiramay at simpatya

Para sa mga napatay na mga magsasaka?

Na hanggang ngayon wala pang hustisya

Madalang na ang mga bidyo at kamera

Na katuwang sa pagtugis sa hustisya

Malapit nilang kaibigan ang may-ari ng istasyong Kapamilya

Hindi mo aasahang maipalabas ang kanilang istorya basta basta

Lalo at tungkol sa mga magsasaka ng luisita

Kahit sa programang 'Maala-ala Mo Kaya?'

Kahit lumiham ka ng ilang beses upang magtangka

Pitong taon na ang lumilipas

Gabi gabi pa din silang naglalamay

Gabi-gabi pa din silang naghahanap

Nakikinig at umaawit sa bawat agunyas

Habang sa saliw nito pagtangis ang dumadagdag

Kailan kaya ang pagwawakas?

pitong taon na ang lumilipas

ang larawan ay mula sa juanrepublic.tumblr.com

makikita din ang akdang ito sa facebook

[piping walang kamay] panalangin: aba ayaw ni noynoy sa barya

aba ayaw ni noynoy sa barya

gusto niya na umapaw sa kanila ang grasya

ang mga panginoong may lupa pa'y kakampi niya

bukod siyang pinagpala sa mga kumandidatong lahat

at pagtapos pinagpala na naman ang kanyang angkan sa tarlak

sinisigurado

pambubusabos

ipinagkakait sa atin ang ating mga karapatan

noon, ngayon at bukas ikamamatay

naten.

[piping walang kamay] nob-em-bre

huwag mong hayaang lumipas itong panahon

kung saan kailangan ang iyong pagtugon

ito ang tila baga ibinubulong

nitong hanging tila ayaw mapagod ngayon

hindi ko pinangarap mahiga sa malambot na kama

at humimpil sa kwartong 'sing lamig ng Alaska ang klima

ang pangarap ko ay isang mainam na pahingahan

kahit nga iyong tambak ng dayami lang ang higaan

at sa isang kubol lang kahit kasama ang kalabaw

mas pipiliin ko na ang ganoon at wala munang kaagaw

sa payapang gabi at panatag na sandali

pagkakataon na bihirang sa akin ay sumagi

mula noong mamulat itong mga mata

na wala sa diploma ang tunay na pag-asa

na hindi ang pagtatapos nitong edukasyon ang mahalaga

kundi kung paano mo ibinabalik sa masa

yaong natutunan mo mula sa pagsusunog ng kilay

at pagtitiis na matuto sa masalimuot nating buhay

iyong ginagamit natin ang ating pag-iisip

na hindi basta-basta tayo sa takot natitigib

lalo't kailangang sa pag-alma tayo kumatig

sapagkat bawat oras tayong walang habas na  sinisiil

nitong sistema ng mga iilang naghahari't ganid

huwag mo akong hayaang maidlip

huwag

at baka magising akong hangin

na ng disyembre ang nahahagip

huwag mong ipahintulot na makatalik ko ang panaginip

at baka bumangon akong bangungot na ang kaniig

sa disyembre na pilit nilang binibihisan nang pagpapanggap

at tinatabingan ng makukulay na palamuti ang halos lahat

upang doon magkubli

mali

upang doon ay ikubli

ang kaapihan ng ating lahi

huwag mong hayaang ako'y maidlip sandali

may laban tayong dapat na isukli

sa ibinabayad nilang pambubusabos sa ating lipi

may dugo tayong sa paniningil mauuwi

kay laon nang naitanim ang binhi

ilang daang taon na ang nagagawi

panahon na upang gapasin ang tagumpay na matagal na nating mithi!

ang larawan ay mula sa gstatic

[severino hermoso] ang alam ng puso ay umibig

walang mata ang puso

walang pang-amoy

walang bibig

walang pandinig

walang kamay

ang tanging alam niyang gawin

ang damhin ang paligid

at hindi matatawaran kung gaano katalas

o sensitibo ang kanyang pakiramdam

para sa pag-ibig

kaya nga mas madarama niya ang pagmamahal

kung ipinapadama ito sa mga kilos at galaw

at hindi basta

sa pamamagitan

ng mga mabulaklak na kataga

hindi ang mga alay na alahas

o mamahaling pumpon ng rosas

simple lamang naman

kung puso at puso ang mangusap

kung baga sa gamot

agad ang talab

walang mata ang puso

walang kinikilalang

titi o puke

kahit na may suso

pero astang lalake

o may titi man

ngunit pusong babae

sapagkat walang kasarian itong sinasabi

basta nahagip ka ng pilyong palaso

nitong mapaglarong kupido

iibig ka

lalake sa lalake

babae sa babae

basta naramdaman ang tulak

ng damdamin

lalo't mula sa puso galing

lahat gagawin

upang ang tinatangi

ay kabigin

walang mata ang puso

walang pang-amoy

walang bibig

walang pandinig

walang kamay

puro damdamin

subalit huwag ipagmali

maging ang puso

nag-iisip

sa kanyang mamahalin

at matututunang ibigin

walang mata ang puso

walang pang-amoy

walang bibig

walang pandinig

walang kamay

ang tanging alam niyang gawin

ang umibig

*salamat sa larawan designzzz.com

ang akda ay makikita din sa facebook.

[severino hermoso] wala(n)(g)awa

walang araw walang bilog na buwan

magpapakapagod upang pagtrabahuan

ang isang bagay na ibig mong matamasa

ganoong kalakaran mamimihasa

ang gamit na iyong nasa

sila ang nagsikap lumikha

ang iyong alahas at relos

damit, pantalon at sapatos

cellphone, laptop, at telebisyon

manggagawa ang bumuo ng mga iyon

ang mga kotse, taxi, jeep at bus

mga manggagawa ang tumapos

kapag iyong binalikan ang nakaraan

ikukuwento sayo ng kasaysayan

kung nanonood ka ng palabas

                    ganoon mo makikita at walang patalastas

bihira ang magtatanong kung kamusta

ang kalagayan nilang mga manggagawa

iyong lumikha ng bagay na pinapangarap

iPhone, iPad, laptop, at maging sasakyan

kung malaman mo kayang sila ay napagsasamantalahan

hanggang sa kasalukuyan

maaatim mo pa rin bang bilhin ang gamit

na ibig pagmay-arian?

naitanong mo ba sa service crew

doon sa paborito mong tanyag na kainan

kung magkano ang sahod nila sa isang araw?

at kung nakasasapat ba ito upang mabuhay

siya at ang pamilyang kailangang itaguyod

nasubukan mo na bang kamustahin sila

na gumawa ng suot mong kamiseta

silang bumuo ng pantalon at sapatos mong magara

na tila nagyayabang ang tatak na nakaimprenta

kamusta kaya sa pinapasukan nilang pabrika?

maayos kaya ang trato sa kanila?

at natitiyak bang hindi nasasamantala

ang karapatang dapat sa kanila

may nakakalungkot na katotohanan

na hindi natin lahat namamalayan

bihira sa atin ang umaalam

sa kanilang sinasapit na kalagayan

*ang larawan ay mula sa acmefineart