Linggo, Oktubre 30, 2011

[piping walang kamay] ang mawalan nga kaya ng tahanan ang kanilang pinili?

naglalakad ako sa kahabaan ng C.M. Recto sa Maynila

naghahanap ako ng makakainang karenderya
nagbabakasakali kahit pasado alas-onse na ng gabi
doon na lamang kasi kakasya ang aking pambili
medyo huli na natapos ang isang gawain at nalimot ang sarili

at mauling nagreklamo ang sikmurang kumakalam
humuhiyaw na ang mga bituka sa loob ng aking tiyan

sa aking paglingon-lingon habang naglalakad 
hindi nakalagpas sa aking paningin ang pag-usad
nitong isang karitong tulak-tulak ng isang mama
at sa loob nito ang kanyang mag-iina
may sanggol na pumapalahaw sa pag-iyak
kahit sinisikap na patahanin ng susong nakapasak
mula sa inang kung iyong makita labis ang pagkayayat

bumuwelo na si tatay upang iparada sa isang tabi
ang mahabang karitong akin na ring masasabi
tahanang kanilang gamit upang doon iraos ang gabi
at ihimlay ang mga katawang pagal at naghahanap ng garahe

hindi ko maiwasang malungkot at matanong sa sarili
ang mawalan nga kaya ng tahanan ang kanilang pinili?
iyong nakahimpil sa lupa, may bubungan at haligi
may pintuan at bintana at kahit papaano may kisame

bakit nga kaya ganoon ang kanilang sinapit?
sisikapin kong marinig ang kanilang kwento

...sa aking pagbabalik.

hahanap muna ako nang kainang magtatawid
sa gutom na kanina pa inirereklamong mapatid


*ang tula ay makikita din sa facebook
ang larawan ay mula sa pinoyphotography.org


Image by FlamingText.com

[maria baleriz liwanag] masisisi mo ba silang magbenta ng sarili?



maliit ang perang laan para sa mga kolehiyo at paaralan
ganun din sa mga institusyong pangkalusugan
paano mapapangalagaan ang batayang karapatan
nitong mga mamamayang binubusog ng kahirapan
sanhi ng labis na pagsasamantala nitong mga naghahari-harian

napakaraming walang trabaho sa paligid
kaya problema maging ang iinuming tubig
samu't-saring tao ang nagtatangka sa mga lansangan
bakasakaling mahanap nila ang magiging puhunan
upang makapagsimula ng kabuhayan
kahit halos magkandautang-utang na ang kalagayan
at ang sasahurin ay tila limos na lamang
kumpara sa tubo at ganansya ng mga may-ari
at ng mga pulitikong mukha na ding mga pari

titiisin ang lahat ng sakripisyong dapat pagdaanan
kahit ang hitsura ay pumila na ang haba ay mula quirino grandstand
hanggang doon sa monumento ni Bonifacio sa Caloocan
dadaigin pa nila ang nakagapos ang mga kamay
sa tiyagang maglakad kahit ang mga paa'y nangangalay 

hindi mo din masisisi kung may kumapit na sa bente-nuebe
at maghanap ng mabibiktima sa pusikit na gabi
o kaya naman sanhi ng kagipitan sa mga gameshow sumasali
pero iyo ba silang masisisi
kung dumulo na sila sa pagbebenta ng sarili?

masisisi mo ba sila matuwid na presidente?

*itong tula ay maaari ding makita sa facebook


Image by FlamingText.com