gumising at magbangon sa umagang niyakap ng lamig
habang ang araw na paparating ay nasasabik sa maaalab na halik
mag-inat sa umagang diniligan ng hamog
humikab sandali upang itakas ang natirang pagod
baunin mo ang payong at panlamig
kanina pa naglalaro ang ulan at hangin sa paligid
kay inam sa diwa ng samyong sumisisid
haplos ng pag-alala sa lumbay at pagpikit
lumuluha ang langit sa kanyang pagbati
dinidilig ng pag-asa ang maramot na ngiti
inaanod ang nanatiling sakit at hapdi
ang larawan ay mula sa fineart america
Walang komento:
Mag-post ng isang Komento