hindi ko ibig ikulong yaring pagmamahal ko sa isang kahon
kung saan ipinaloob ang tsokolate upang magmistulang
kumikinang na dyamante sa sandaling ilabas na't
mahagip nitong mga nagkalat na silahis
ang pambalot na palarang nagpakintab sa kulay bughaw
hindi ko ibig igapos yaring pagmamahal
sa isang pumpon ng bulaklak na iaalay sa iyo
upang kahit papaano
pangitiin ang nalulungkot na puso
at palisin ang luhang sa mata mo'y
nakalambong at ibig nang tumulo
aabutan na lamang kita
isang rosas
huwag lamang
igapos ang kahit anong bulaklak
sa isang pumpong pang-alay para sa pagmamahal
pagkat hindi itinatali
ang damdaming dakila at busilak
na mananatili
na mananatili
kahit magwakas na ang ating nobela
sa daigdig na mayroon tayo
sa kasalukuyan
Walang komento:
Mag-post ng isang Komento