ang init ng sitwasyon
kay rami ng nawawala at bumibilang
ng walang habas
sandamakmak na ang humahandusay
sa lupa
at di na masukat ang dugong dumanak
mga katawang naging pataba
sa burak at putik ng pakikibaka
nasaan ka nga ba?
maisip mo sana kung gaano ka kahalaga
kung paanong ang iyong pagsama
maliban sa pagsuporta
ang isa sa magiging salik
na magpapatiyak ng tagumpay
ng hustisya
nanggigitata man ako
amoy pawis man at malansa
dulot ng dugong umaagos mula
sa sugatan kong ulunan
at pumutok na kilay
bunga ng nagdaang gasgasan
sa isang pagkilos
doon sa daang mendiola
huwag ka sanang matakot sa amin
hindi naman kami kriminal
huwag ka sanang lumayo sa amin
hindi naman kami magnanakaw
kagaya ng mga nandoon sa malakanyang
na patuloy na sumisipsip
sa yaman at lakas ng sambayanan
para patuloy na yumaman
huwag kang mandiri sa amin
hindi naman kami imoral
kapara ng mga nandoon sa palasyo
at sampu ng kanyang mga despotikong
bayarang berdugo
halika at lumapit sa amin
handa kaming kalingain ka ng aming
mapagpalayang prinsipyo
na mula din naman sa inyo
sa masang siyang lakas
sa sambayanang siyang kayamanan
di mauutas at malalagas
halika at lumapit sa amin
kailangan din namin ang iyong pagkalinga
ang pang-unawa at pakiki-isa
sa ating laban at mithiing
paglaya
halika at sumama
sabay sabay tayo
yakapin natin ang pakikibaka
halikan natin ang tagumpay
ang larawan ay mula sa fineart america
