kamusta setyembre?
ang pangangailangan mo
humigpit pang lalo
dahil ba palapit ang pasko?
wala pang isang linggo
mula noong dumating ka dito
may isang dalagang nanginginig sa takot
isang patalim ang sa kanya itinutok
ng isang gipit na mandurukot
pera at cellphone ang pakay
inarbor pilit ng lumpen sa kanyang kamay
sa kainitan ng hapon kahit matao ang binabaybay
habang binabagtas ang overpass
lumuluha sa pangyayaring dinanas
hindi na nagawang habulin ang sumalakay
habag at pagkalinga ang naialay
ng mga taong nakasaksi at walang nagawa
dahil na din sa takot sa matalas
na hawak ng lumpen at iwinawasiwas
walang pulis kundi mga taga-ayos ng trapiko
sa ilalim ng tulay nakapwesto
kung kaya walang nakapigil noong kumaripas ng takbo
upang makalayo at makatakas
patungo sa dagat ng mga naglalakad na tao
at maglaho
habang ang dalaga
naiwang naglalakad at lumuluha
mabigat ang loob sa nawala
hindi napigilang magbulalas ng sumpa
Walang komento:
Mag-post ng isang Komento